२०८२ माघ १० गते शनिवार
२०८२ माघ १० गते शनिवार
काठमाडौँ । प्रतिनिधिसभा विघटनसम्बन्धी मुद्दामा सर्वोच्च अदालतको संवैधानिक इजलासमा बुधबार पनि सुनुवाइ जारी छ । प्रधानन्यायाधीश चोलेन्द्रशमशेर राणासहित विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसीको इजलासमा सुनुवाइ भइरहेको छ ।
बहसका क्रममा कानुन व्यवसायीले तीन घण्टासम्म समय लिन थालेपछि प्रधान्यायाधीश चोलेन्द्रशमशेर राणाले बहसका लागि समय निर्धारण गरिदिएका छन् । संवैधानिक इजलासमा बुधबारको सुनुवाइ सुरु भएपछि प्रधानन्यायाधीश राणाले समय तोकिएको जानकारी दिए । उनले वरिष्ठ अधिवक्ता चन्द्रकान्त ज्ञवालीलाई ३० मिनेटमा अफ्नो बहस सक्न भने ।
बहस गर्ने वकिल थुप्रै भए पनि दैनिक तीनरचार जनाले नै बहसको समय सिध्याउन थालेपछि प्रधानन्यायाधीशले समय तोकिदिएका हुन् ।
निवेदकतर्फबाट वकालत गर्न नाम टिपाउन आएकाहरूलाई समेत प्रधानन्यायाधीश राणाले रोकेका छन् । उनले भने, "नाम नथप्नोस् ।"
न्यायाधीश अनिलकुमार सिन्हाका अनुसार निवेदकतर्फबाट वकालतका लागि ३ सय ५० जनाले नाम टिपाएका छन् । अहिले निवेदकतर्फका कानुन व्यवसायीहरू बहसमा छन् ।
अधिवक्ता अनिता मानन्धरले रातारात संविधान बनाउनेलाई नै संविधानको कुन धारामा के छ भन्ने कुरा थाहा नभएको टिप्पणी गरिन् । न्यायाधीश सपना प्रधान मल्ले उनलाई भनिन्, "धारा ७६ को उपधारा ७ मा विघटन छ । त्यसमा फोकस गर्नुहोस् । यसरी बहस गर्नुभयो भने त फैसला कहिले गर्ने ?"
त्यसपछि मानन्धरले संविधानको धारा ७६ पढेर सुनाउन थालिन् । लगत्तै प्रधानन्यायाधीश चोरेन्द्रशमशेर राणाले भने, "त्यो धारा नपढ्नोस्, हामीले धेरैपटक सुनिसक्यौँ ।"
बहसका क्रममा वरिष्ठ अधिवक्ता कृष्णप्रसाद भण्डारीले प्रधानमन्त्री केपी ओलीले "छोरी कुटेर बुहारी तर्साउने" काम गरेको बताए । उनले संसद् विघटन गरेर ओलीले नागरिकको सार्वभौमसत्तामाथि प्रहार गरेको बताए । नागरिकको सार्वभौमसत्ताका अगाडि केपी ओली कोही नभएको उनले बताए । भण्डारीले भने, "मेरो सार्वभौमसत्ताका अगाडि ओलिको आधिकार केही होइन ।"
उनले न्यायाधीशहरूमाथि गम्भीर आरोपसमेत लगाएका छन् । महाअभियोगको डरले न्यायाधीशहरू राजनीतिक नेताको दासजस्तै बनेको उनको आरोप छ । "न्याायधीशहरू महाअभियोग लाग्ला कि भनेर डराउँदै नेताको कुरा मानिरहेका छन्", उनले भने ।
© 2026 All right reserved to khabarcnter.com | Site By : Sobij
