२०८२ आश्विन २८ गते मंगलवार
२०८२ आश्विन २८ गते मंगलवार
पोखरा । कास्कीको पोखरामा अविरल वर्षापछिको पहिरोले घर बगाउँदा पुरिएर पाँच जनाको मृत्यु भएको छ भने एकजना बेपत्ता भएका छन् । अरु पाँचजना घाइते भएको कास्कीका प्रहरी प्रमुख एसपी रमेश थापाले जानकारी दिएका छन् ।
मृत्यु हुनेमा पोखरा महानगरपालिका–२० भलामका ४५ वर्षीय कृष्ण श्रेष्ठ, उनकी श्रीमती ३५ वर्षिया सुनमाया तामाङको मृत्यु भएको थापाले जानकारी दिए । उनीहरुका तीनवर्षका छोरा सन्तोष बेपत्ता छन् भने अर्का ९ वर्षीयय छोरा राजकुमार घाइते भएका छन् । सुनमायाको घटनास्थलमै र श्रेष्ठको अस्पतालमा उपचारका क्रममा मृत्यु भएको हो ।
त्यस्तै पोखरा–२० भलामको मुलाबारी देउरालीमा घर भत्किँदा २९ वर्षीया विष्णु सार्की र उनका ८ वर्षका छोरा सन्तोष सार्कीको पनि मृत्य भएको थापाले जानकारी दिए ।
त्यस्तै पोखरा–११ नमूनाटोलस्थित घर पहिरोमा पुरिँदा ४२ वर्षीय लक्ष्मण सार्कीको मृत्यु भएको पनि डिएसपी हमालले बताए । उनकी १४ वर्षीया छोरी श्रृष्टि उपचारपछि घर फर्केकी छिन् । त्यस्तै पोखरा–११ बसेरीमा पनि पहिरोमा परेर तीनजना घाइते भएको छन् ।
बुधबार बेलुकी परेको भीषण वर्षापछि पोखरा आसपासका क्षेत्रमा पहिरो आएको छ । पहिरोले पोखरा २० मा धेरै क्षति गरेको पोखरा महानगरपालिका वडा नम्बर २० का वडा अध्यक्ष सिम गुरुङले बताए ।
पोखरामा केही वर्षयता अस्वभाविक वर्षा भैरहेको छ । जमिनभित्रको चुनसँग पानी मिसिँदा ठाउँठाउँमा भासिएको छ । पोखराभरीका सडकमा खोला बगेको थियो ।
पोखरा ५ स्थित फिर्के पुल बगाएको छ भने विभिन्न छोरेपाटन, कमलपोखरी, लेखनाथ क्षेत्रका केही भागमा डुवान भएको थियो । पोखरामा वितेको २४ घण्टामा २ सय २१ दशमलव ४ मिलिमिटर पानी परेको हावापानी कार्यालय पोखराले जनाएको छ ।
© 2025 All right reserved to khabarcnter.com | Site By : Sobij
