२०८२ माघ १५ गते बिहिवार
२०८२ माघ १५ गते बिहिवार
पछिल्लो राजनीतिक घटनाक्रमको समीक्षा र पार्टीको भावी रणनीति तय गर्न नेकपा एमाले महाधिवेशन आयोजक कमिटीको बैठक भोलि बुधवार बस्दैछ ।
भोलिको बैठकका लागि माधव नेपाल पक्षका ११ जनाबाहेक अन्यलाई सूचना गरिएको एमाले केन्द्रीय कार्यालयका सचिव शेरबहादुर तामाङले जानकारी दिए ।
‘कारवाहीमा परेका ११ जना मध्येका केन्द्रीय सदस्यबाहेक अन्यलाई बोलाइएको छ,’ तामाङले भने ।
नेता नेपाल, भीम रावल, मुकुन्द न्यौपाने, रामकुमारी झाक्री लगायत ११ जनालाई निमन्त्रणा गरिएको छैन । महाधिवेशन आयोजक कमिटीको बैठक बुधवार बिहान ११ बजे बालुवाटारमा बस्ने तय भएको छ ।
कर्णाली प्रदेशमा ‘फ्लोर क्रस’ गरेको, बागमती प्रदेशमा पार्टीको उम्मेदवारको विपक्षमा मतदान गरेको तथा नेपाली कांग्रेसका सभापति शेरबहादुर देउवालाई प्रधानमन्त्री बनाउन हस्ताक्षर गरेको भन्दै नेपालसहित ११ जना कारवाहीमा परेका थिए ।
नेताहरू योगेश भट्टराई, गोकर्ण विष्ट, सुरेन्द्र पाण्डे लगायतलाई बुधवारको बैठकमा सहभागिताको लागि सूचना गरिएको छ ।
‘भोलिको बैठकमा सहभागी हुनेबारे उहाँहरू छलफलमा जुट्नुभएको सूचना पाएका छौं,’ संस्थापन पक्षका एक नेताले भने ।
बुधवारको बैठकमा पूर्व माओवादी पृष्ठभूमिका रामबहादुर थापा, टोपबहादुर रायमाझी लगायतका नेताहरू भने सहभागी हुनेछन् । सचिव तामाङले रामबहादुर थापा लगायतका नेताहरू बैठकमा सहभागी हुने जानकारी दिए ।
अहिलेको एमाले नेकपाको उत्तराधिकारी पार्टी भएकाले एकतापछि एमालेमा रहेका नेताहरू बैठकमा सहभागी हुने संस्थापन पक्षले बताएको छ ।
बुधवारको बैठकले नेकपा एमालेलाई जेठ २ गतेको अवस्थामा फर्काउने निर्णय लिने अपेक्षा गरिएको छ । बुधवारको बैठकको तयारी स्वरूप एमाले स्थायी कमिटीको बैठक मंगलवार बस्दैछ ।
प्रधानमन्त्री निवास बालुवाटारमा साँझ ५ बजेपछि बैठक बस्न लागेको छ ।
© 2026 All right reserved to khabarcnter.com | Site By : Sobij
