२०८२ भाद्र ४ गते बुधवार
२०८२ भाद्र ४ गते बुधवार
काठमाडौं । काठमाडौंमा कोरोनाभाइरसविरुद्ध चिनियाँ खोप 'भेरोसेल'को दोस्रो डोज आजबाट लगाउन थालिएको छ ।
गत २५ चैतदेखि १५ वैशाखसम्म पहिलो डोज लगाएका नागरिकलाई आजबाट दोस्रो डोज दिन थालिएको हो । बागमती प्रदेशको सामाजिक विकास मन्त्रालयले सूचना प्रकाशित गरी काठमाडौंमा आजबाट ११ जेठसम्म खोप लगाइने जनाएको छ ।
भेरोसेलको दोस्रो डोजका लागि काठमाडौं महानगरपालिकाका सबै वडामा खोप केन्द्र राखिएको छ । चन्द्रागिरि नगरपालिकाका तीन ठाउँमा, कीर्तिपुर नगरपालिकाको नयाँबजार गेट र बुँगाउँमा खोप केन्द्र तोकिएका छन् ।
यसैगरी, बूढानीलकण्ठ नगरपालिकाका गणेश मावि र बाल उद्धार मावि, गोकर्णेश्वर नगरपालिकाका नेपाल मेडिकल कलेज र चामुण्डा मावि, नागार्जुन नगरपालिकाका राजकोट प्राथमिक स्वास्थ्य केन्द्र र इचंगुनारायण स्वास्थ्य चौकीमा खोप केन्द्र तोकिएका छन् ।
मनहराको गोठाटार स्वास्थ्य चौकी र तारकेश्वरको मनमैजु स्वास्थ्य चौकीमा खोप केन्द्र राखिएका छन् । भेरोसेलको दोस्रो डोज लगाउन यसअघि दिइएको कार्ड र आफ्नो परिचय खुल्ने कागजपत्र लैजान स्वास्थ्य कार्यालयले अनुरोध गरेको छ ।
यी ठाउँमा लगाइँदै छ खोप
© 2025 All right reserved to khabarcnter.com | Site By : Sobij
