२०८२ भाद्र २ गते सोमवार
२०८२ भाद्र २ गते सोमवार
काठमाडौं । बैंकिङ प्रणालीमा अधिक तरलता भएपछि नेपाल राष्ट्र बैंकले बुधबार ४० अर्ब तरलता खिच्ने भएको छ । बुधबार निक्षेप संकलन उपकरण बोलकबोल मार्फत २१ दिनका लागि ४० अर्ब तरलता खिच्न लागिएको राष्ट्र बैंकले जनाएको छ ।
बैंकिङ प्रणालीमा अधिक तरलता भएपछि राष्ट्र बैंकले नियमित तरलता खिचिरहेको छ । २०८० फागुनदेखि स्थायी निक्षेप सुविधा ल्याएको केन्द्रीय बैंकले निक्षेप संकलन उपकरण बोलकबोल मार्फत पनि तरलता खिचिरहेको छ ।
बुधबार ३ बजेभित्र निक्षेप संकलन उपकरणमा लगानी गर्न इच्छुक बैंकले बोलकबोल पेस गर्नुपर्नेछ । ब्याजदर बोलकबोलबाट तय हुने र निक्षेप संकलन उपकरणमा लगानी गर्ने बैंकले सावाँ र ब्याज २ असोजमा फिर्ता पाउने केन्द्रीय बैंकले जनाएको छ ।
निक्षेप संकलनको बोलकबोल ब्याजदरमा गर्नुपर्नेछ । बहुब्याजदरमा पनि बहुबोलकबोल गर्न सकिने राष्ट्र बैंकले जनाएको छ । निक्षेप संकलनको बोलकबोलमा निक्षेप बापत जम्मा गर्न चाहेको रकम र ब्याजदर ९दशमलव पछिको हकमा चार अंकसम्म० उल्लेख गर्नु पर्नेछ ।
निक्षेप संकलनका लागि आह्वान गरिएको रकम बाँडफाँट गर्दा बोलबमोजिम सबैभन्दा कम ब्याजदरलाई पहिलो प्राथमिकता क्रममा राखी आह्वान गरेको रकमसम्म क्रमशः बाँडफाँट गरिने राष्ट्र बैंकले उल्लेख गरेको छ ।
आह्वान गरिएको रकममध्ये सम्पूर्ण वा आंशिक रकमको बोल स्वीकार वा अस्वीकार गर्ने अधिकार समितिलाई रहने उल्लेख छ ।
© 2025 All right reserved to khabarcnter.com | Site By : Sobij
