२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । चालु आर्थिक वर्षको पहिलो ६ महिना सकिएपछि शुरु भएको प्रधानमन्त्री रोजगार कार्यक्रममा २ लाख बरोजगारले रोजगारी पाउने भएका छन् । सो कार्यक्रम अन्तर्गत महिनामा औसत ६ दिन काम पाउने छन् ।
हालसम्म ११ हजार ७ सय ६५ जना बेरोजगारले ६९ हजार ९०६ दिन बराबरको रोजगारी पाएका छन् । श्रम, रोजगार तथा समाजिक सुरक्षा मन्त्रालयका अनुसार चालु आर्थिक वर्षमा सरकारले सो कार्यक्रमको लागि १० अर्ब ३४ करोड विनियोजन गरेको छ ।
कार्यक्रमले औसत ५ सय रुपैयाँ ज्याला दिएर सूचीकृत बेरोजगारलाई वर्षमा १ सय दिनको ज्याला दिने गरी रोजगारी प्रदान गर्ने मन्त्रालयका सचिव तोयम रायाले बताए । ‘स्थानीय तहमा साउनमा नै उक्त कार्यक्रम सञ्चालन गर्नको लागि अख्तियारी गएको हो,’ उनले भने ‘बेरोजगार बढी भएका स्थानीय तहमा बजेट अपुग भए फेरि पनि दिनु पर्ने हुन्छ । एउटा स्थानीय तहलाई यति भन्दा पनि आवश्यकता र बेरोजगारको सूची अनुसार न्यूनतम एक दिन काम दिने सरकारको योजना हो ।
उक्त आयोजनामा अहिलेसम्म स्थानीय तहहरूले ३ हजार २३ वटा साना आयोजनामा श्रमिकले काम गरेको बताएको छ । मन्त्रालयका अनुसार यो अवधिमा करिब ७ अर्ब बजेट बजेट स्थानीय तहहरुमा पठाइसकिएको छ । २ लाख बेरोजगारलाई न्यूनतम १०० दिनको रोजगारी उपलव्ध गराउने सरकारको योजना भएको सचिव रायाले बताए ।
‘स्थानीय तहसँग बेरोजगारहरूको सूची छन्,’ उनले भने ‘प्रधानमन्त्री रोजगार कार्यक्रमको प्रावधानअनुसार बेरोजगारले रोजगारी पाउँछन् ।’ हाल स्थानीय तहको रोजगार सेवा केन्द्रमा ७ लाख ४३ हजार २०५ जना बेरोजगार सूचीकृत भएका छन् ।
स्थानीय तहमा सञ्चालित सार्वजनिक निर्माण कार्यमा श्रममूलक विधिबाट आयोजना कार्यान्वयन गराउने सरकारको तयारी हो । विगतका वर्षहरूमा पनि यो कार्यक्रम अन्तर्गत सडकको नाली सफा गर्ने, झार उखेल्ने, सडक तथा मन्दिर बढार्ने लगायतका काम लगाएर सरकारले आफ्ना कार्यकर्तालाई अर्बौ रुपैयाँ खर्चिएको थियो ।
© 2025 All right reserved to khabarcnter.com | Site By : Sobij
