२०८२ भाद्र १३ गते शुक्रवार
२०८२ भाद्र १३ गते शुक्रवार
काठमाडौं । ललितपुरको महालक्ष्मी नगरपालिका-७ चाँगाथलीमा घरभित्रै सोमवार एक दम्पती मृत अवस्था फेला परेका छन् । राजविराज घर भएका र लामो समयदेखि ललितपुरमा बस्दै आएका ३२ वर्षीय सागर पोखरेल र उनकी २२ वर्षीय श्रीमती निर्मला पोखरेल मृत अवस्थामा भेटिएका हुन् ।
चार वर्षदेखि फ्लाट भाडामा लिई बस्दै आएका उनीहरु आफ्नो कोठामा मृत अवस्थामा भेटिएको महानगरीय प्रहरी परिसर ललितपुरकी प्रमुख एसएसपी किरण बज्राचार्यले बताइन् । घटनास्थलबाट प्रहरीले स्लफर नामको विषादीको बट्टासमेत फेला पारेको छ।
"विष भेटिनुले आत्महत्यातिर नै अनुसन्धान केन्द्रित भएको छ। तर, अन्य एङ्गलबाट पनि अनुसन्धान गरिरहेका छौं," एसएसपी बज्राचार्याले बताइन् ।
मृत पुरुष भने भेटनरीको सामान सप्लाइ गर्दै आएका थिए। उनीहरुको गत फागुनमा विवाह भएको आफन्तले प्रहरीलाई जानकारी दिएका छन् । तर, अहिलेसम्म उनीहरुको मृत्युको कारण भने खुलिसकेको छैन । घरमा कोही नभएको मौका छोपी आत्महत्या गरेको प्रहरीको प्रारम्भीक अनुसन्धानले देखाएको छ ।
प्रहरीले घटनास्थलबाट कुनै पनि सुसाइड नोट र मृत्युको कारण खुल्ने कुनै पनि कागजपत्र भेटेको छैन। उनीहरुको मोबाइलमा कुनै जानकारी वा केही भेटिने आशंकामा प्राविधिक पक्षको अनुसन्धान सुरु गरिएको छ। बन्द कोठाभित्र उनीहरु मृत फेला परेका थिए । पुरुषको शरीरको तल्तो भाग अर्धनग्न भएको प्रहरीले जानकारी दिएको छ। आज मृत भेटिएका दम्पतीको शव पोष्टमोर्टमको तयारी भइरहेको छ।
© 2025 All right reserved to khabarcnter.com | Site By : Sobij
